PCN TVONLINE

ថ្ងៃសៅរ៍ ទី០៩ ខែធ្នូ ឆ្នាំ២០៥០

គេហទំព័រ ទូរទស្សន៍ភីស៊ីអិន ធីវីអនឡាញ

ទំព័រដើម ព័ត៌មានជាតិ ព័ត៏មានអន្តរជាតិ ព័ត៌មានសន្តិសុខសង្គម ព័ត៌មានស៊ើបអង្កេត

ព័ត៌មានថ្មីបំផុត

រដ្ឋមន្ដ្រីក្រសួងមហាផ្ទៃ ជួបសំណេះសំណាល ជាមួយថ្នាក់ដឹកនាំក្រសួងមហាផ្ទៃ **|**

រដ្ឋមន្ដ្រីក្រសួងមហាផ្ទៃ ជួបសំណេះសំណាល ជាមួយថ្នាក់ដឹកនាំក្រសួងមហាផ្ទៃ

(ភ្នំពេញ)៖ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅព្រឹកថ្ងៃទី០៤ ខែកញ្ញា ឆ្នាំ២០២៣នេះ បានជួបសំណេះសំណាល ជាមួយថ្នាក់ដឹកនាំក្រសួងមហាផ្ទៃ ព្រមទាំងប្រធានអង្គភាពនានាចំណុះក្រសួងមហាផ្ទៃ។

ជំនួបនេះ ធ្វើឡើងនៅទីស្ដីការក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការ អគ្គនាយក នៃអគ្គនាយកដ្ឋាន អគ្គស្នងការនគរបាលជាតិ ប្រធាននាយកដ្ឋានកណ្ដាល និងប្រធាននាយកដ្ឋានទាំងអស់។

គួរជម្រាបថា ចាប់ពីតាំងពីចូលកាន់តំណែងជារដ្ឋមន្ដ្រីក្រសួងមហាផ្ទៃ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី បានធ្វើការជួបប្រជុំជាបន្ដបន្ទាប់ ជាមួយថ្នាក់ដឹកនាំក្រសួង និងប្រធានអង្គភាពជំនាញតាំងពីថ្នាក់ជាតិ រហូតដល់ស្នងការនគរបាលរាជធានី-ខេត្ត។ ក្នុងកិច្ចប្រជុំកន្លងមកនេះ លោកអភិសន្ដិបណ្ឌិត ស សុខា តែងតែបានគូសរំលេចអំពីផែនការយុទ្ធសាស្ដ្ររបស់រាជរដ្ឋាភិបាល នីតិកាលទី៧ ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ពិសេសយុទ្ធសាស្ដ្របញ្ចកោណ ដំណាក់កាលទី១។

លោកអភិសន្ដិបណ្ឌិត ស សុខា បានដាក់ចេញនូវការណែនាំឲ្យថ្នាក់ដឹកនាំក្រសួង និងថ្នាក់ដឹកនាំបណ្ដាស្ថាប័ននានាទាំងអស់ ត្រូវផ្ដោតសំខាន់លើការងារបម្រើប្រជាពលរដ្ឋ ដោយធ្វើយ៉ាងណាឲ្យស្របតាមយុទ្ធបញ្ចកោណរបស់រាជរដ្ឋាភិបាល។ លើសពីនេះ លោកបានជំរុញឲ្យយកចិត្ដទុកដាក់ពង្រឹងប្រសិទ្ធភាពការងារទៅតាមតួនាទី ភារកិច្ចរបស់ខ្លួនប្រកបដោយការទទួលខុសត្រូវខ្ពស់ និងបង្កើននូវជំនឿទុកចិត្តពីសំណាក់ប្រជាពលរដ្ឋ។

ដោយឡែក សម្រាប់ស្ថាប័ននគរបាលជាតិ ត្រូវបន្ដខិតខំប្រឹងប្រែងពង្រឹងការអនុវត្តច្បាប់ឲ្យបានម៉ឺងម៉ាត់ និងប្រកាន់ខ្ជាប់នូវឥរិយាបថទន់ភ្លន់ សំដៅធ្វើយ៉ាងណាទប់ស្កាត់ បង្ការ និងបង្ក្រាបបទល្មើសនានាដែលកើតឡើងឲ្យកាន់តែមានប្រសិទ្ធភាពខ្ពស់ ដើម្បីភាពសុខសាន្ដរបស់ប្រជាពលរដ្ឋ៕