ថ្ងៃព្រហស្បតិ៍ ទី០៩ ខែកុម្ភៈ ឆ្នាំ២០៥០
គេហទំព័រ ទូរទស្សន៍ភីស៊ីអិន ធីវីអនឡាញ
កម្ពុជានឹងឈប់បញ្ជូនកីឡាករទៅប្រកួតក្នុងព្រឹត្តិការណ៍តំណាងជាតិដែលជ្រកក្រោមឈ្មោះ «Muay Thai»
Tue,24 January 2023 (Time 07:59 AM)
ដោយ ៖ (ចំនួនអ្នកអាន: 30នាក់)

ភ្នំពេញ៖ កម្ពុជាប្រកាសថានឹងឈប់បញ្ជូនអត្តពលិកចូលរួមប្រកួតក្នុងវិញ្ញាសាប្រដាល់ក្នុងព្រឹត្តិការណ៍តំណាងជាតិក្រោមឈ្មោះ «Muay Thai» ប្រសិនបើថៃ ឬប្រទេសផ្សេងទៀតមិនចូលរួមប្រកួតវិញ្ញាសា «Kun Khmer» ក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាជាម្ចាស់ផ្ទះឆ្នាំ២០២៣នេះ។ នេះបើតាមសារព័ត៌មានក្នុងស្រុកចេញផ្សាយកាលពីថ្ងៃទី២២ ខែមករា ឆ្នាំ២០២៣។

អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ (CAMSOC) ឯកឧត្តម វ៉ាត់ ចំរើន បានធ្វើលិខិតមួយច្បាប់ប្រាប់ដល់គណៈកម្មាធិការ អូឡាំពិកនៃប្រទេសអាស៊ានទាំងអស់ថា កម្ពុជាបានប្រើប្រាស់គុនខ្មែរជាផ្លូវការជំនួសពាក្យ «Muay» សម្រាប់ការប្រកួតកីឡាស៊ីហ្គេម ឆ្នាំ២០២៣ ខណៈការប្ដូរពាក្យនេះគឺជាជំហរកម្ពុជា ដើម្បីកុំឱ្យមានភាពច្របូកច្របល់ ឬការប្រកាន់របស់ប្រជាពលរដ្ឋខ្មែរ ក្នុងការប្រើពាក្យ «Muay» នេះ។

ឯកឧត្តម វ៉ាត់ ចំរើន បានបញ្ជាក់ថា ការប្រកាសពីប្រទេសថៃថា មិនចូលរួមបែបនេះ មិនមែនជាបញ្ហាសម្រាប់កម្ពុជានោះទេ ព្រោះជាសិទ្ធិសម្រេចរបស់ប្រទេសនោះ ដោយបច្ចុប្បន្នមានប្រទេសចំនួន ៦ហើយដែលនឹងចូលរួមប្រកួតក្រោមវិញ្ញាសាគុនខ្មែរ។ ឯកឧត្តមថា បើថៃ ឬប្រទេសផ្សេងទៀតមិនព្រមចូលរួមប្រកួតដោយសារតែមានពាក្យថា គុនខ្មែរ នោះកម្ពុជាក៏នឹងមិនចូលរួមការប្រកួតព្រឹត្តិការណ៍ដែលធ្វើឡើងក្រោមឈ្មោះ «Muay Thai» ដូចគ្នាដែរ។

ជាមួយគ្នានេះដែរ ក្រោយការប្រកាសលុបចោលការប្រើពាក្យ «Muay» នេះ មានសារព័ត៌មានធំៗរបស់ថៃមួយចំនួនបានផ្សាយថា ប្រទេសថៃ និងសមាគម IFMA ដែលមានប្រទេសមួយចំនួនក្នុងតំបន់អាស៊ានជាសមាជិកនឹងមិនចូលរួមប្រកួតក្នុងវិញ្ញាសាប្រដាល់ «KunKhmer» នោះទេ នឹងបានប្រកាសជាផ្លូវការដល់ប្រទេសជាសមាជិកណាដែលបញ្ជូនអត្តពលិកទៅប្រកួតប្រដាល់គុនខ្មែរដែលរៀបចំនៅកម្ពុជាឆ្នាំនេះ នឹងត្រូវហាមឃាត់ភ្លាមៗក្នុងព្រឹត្តិការណ៍ផ្សេងទៀតដែល IFMA អនុម័តនាពេលខាងមុខនៅចុងឆ្នាំ២០២៣។

សូមជម្រាបថា Muay គឺជាភាសាថៃដែលមានន័យថា កីឡាប្រដាល់ ដែលភាគច្រើនគេប្រើពាក្យថា Muay Thai យោងតាម olympics.com បានប្រើប្រាស់ក្នុងការប្រកូតកីឡាស៊ីហ្គេមតាំងពីឆ្នាំ២០០៥ តែត្រូវបានប្ដូរវិញនៅឆ្នាំ២០០៩ ទៅជា Muay Lao និងត្រូវដកចេញពីការប្រកួតទាំងស្រុងក្នុងឆ្នាំ២០១១ និង២០១៥ តែការប្រកួតកីឡា Muay ត្រូវបានយកមកប្រកួតវិញក្នុងឆ្នាំ២០២១ នៅពេលដែលវៀតណាមធ្វើជាម្ចាស់ផ្ទះ៕

ព័ត៌មានគួរចាប់អារម្មណ៍

សម្តេច ស ខេង ស្នើអ្នកនាំពាក្យគ្រប់ក្រសួង-ស្ថាប័ន រួមសហការពង្រឹងគុណភាព និងឯកភាពព័ត៌មានក្នុងជួររដ្ឋបាលរាជធានី-ខេត្ត ()

ព័ត៌មានគួរចាប់អារម្មណ៍

សម្ដេចក្រឡាហោម ស ខេង ណែនាំដល់អភិបាលរាជធានី-ខេត្ត ត្រូវដោះស្រាយគ្រប់បណ្តឹងទាំងអស់ឱ្យច្បាស់លាស់ និងត្រឹមត្រូវបំផុត ()

ព័ត៌មានគួរចាប់អារម្មណ៍

សម្តេចក្រឡាហោម ស ខេង ៖ ច្បាប់ចរាចរណ៍ផ្លូវគោកថ្មី នឹងតម្រូវឱ្យអ្នកបើកបរ យានយន្តធ្វើតេស្ត រកសារធាតុញៀន ()

ព័ត៌មានគួរចាប់អារម្មណ៍

សម្ដេចក្រឡាហោម ស ខេង ៖ ការបណ្ដុះបណ្ដាលមន្ដ្រីនគរបាលជាតិ ត្រូវធ្វើឱ្យជាប់ជាប្រចាំ និងគ្មានទីបញ្ចប់ ដើម្បីរក្សាសន្ដិសុខជាតិឱ្យបានរឹងមាំ ()

ព័ត៌មានគួរចាប់អារម្មណ៍

សម្តេចតេជោ ហ៊ុន សែន ជួបពិភាក្សាជាមួយរដ្ឋមន្រ្តីកសិកម្ម, លោកបណ្ឌិត យ៉ង សាំងកុមារ និងលោក ឡឹក សុធារ លើការងារកសិកម្ម ()

វីដែអូ